International
விளையாட்டு

உனத்கட் அபார பந்து வீச்சு: குஜராத்தை வீழ்த்தி இறுதி போட்டிக்கு முன்னேறியது சவுராஷ்டிரா


ராஜ்கோட்டில் நடைபெற்ற ஆட்டத்தில் குஜராத்தை வீழ்த்தி ரஞ்சி டிராபி இறுதி போட்டிக்கு முன்னேறியது சவுராஸ்டிரா.

ரஞ்சி டிராபியின் முதல் அரையிறுதி போட்டி ராஜ்கோட்டில் நடைபெற்றது. சவுராஷ்டிரா அணிக்கெதிராக குஜராத் டாஸ் வென்று பந்து வீச்சை தேர்வு செய்தது. அதன்படி முதலில் களம் இறங்கிய சவுராஷ்டிரா ஷெல்டன் ஜாக்சனின் (103) சதத்தால் முதல் இன்னிங்சில் 304 ரன்கள் சேர்த்து ஆல்அவுட் ஆனது.

பின்னர் முதல் இன்னிங்சை தொடங்கிய குஜராத் 252 ரன்னில் ஆல்அவுட் ஆனது. ருஜுல் பாட் அதிகபட்சமாக 71 ரன்கள் சேர்த்தார். சவுராஷ்டிரா அணியின் உனத்கட் 3 விக்கெட்டும் சகாரியா, ஜானி மற்றும் ஜடேஜா ஆகியோர் இரண்டு விக்கெட்டுகள் வீழ்த்தினர்.

52 ரன்கள் முன்னிலையுடன் சவுராஷ்டிரா 2-வது இன்னிங்சில் விளையாடியது. வாசவதா சிறப்பாக விளையாடி 139 ரன்கள் விளாச, சவுராஷ்டிரா 2-வது இன்னிங்சில் 274 ரன்கள் சேர்த்து ஆட்டமிழந்தது. முதல் இன்னிங்சில் 52 ரன்கள் முன்னிலைப் பெற்றிருந்ததால் குஜராத் அணிக்கு 327 ரன்கள் வெற்றி இலக்காக நிர்ணயித்துள்ளது.

327 ரன்கள் அடித்தால் வெற்றி என்ற இலக்குடன் குஜராத் அணி களம் இறங்கியது. அந்த அணியின் தொடக்க வீரர் பன்சால் ரன்ஏதும் எடுக்காமல் டக்அவுட் ஆனார். நேற்றைய 4-வது நாள் ஆட்ட முடிவில் குஜராத் 1 விக்கெட் இழப்பிற்கு 7 ரன்கள் எடுத்திருந்திருந்தது.

இன்று கடைசி நாள் ஆட்டம் நடைபெற்றது. உனத்கட் அபாரமாக பந்து வீச குஜராத் 63 ரன்கள் எடுப்பதற்குள் ஐந்து விக்கெட்டுகளை இழந்து திணறியது. 6-வது விக்கெட்டுக்கு கேப்டன் பார்தீவ் பட்டேல் உடன் சிராக் காந்தி ஜோடி சேர்ந்தார்.

இந்த ஜோடி அபாரமாக விளையாடியது. சவுராஷ்டிரா பந்து வீச்சாளர்கள் இந்த ஜோடி வீழ்த்த திணறினர். இருவரும் சதத்தை நோக்கி சென்றனர். அதேவேளையில் வெற்றியை நோக்கியும் குஜராத் நடைபோட்டது.

இறுதியாக அணியின் ஸ்கோர் 221 ரன்னாக இருக்கும்போது பட்டேல் 93 ரன்கள் எடுத்த நிலையில் ஆட்டமிழந்தார். அத்துடன் குஜராத் அணி தோல்வியை நோக்கி சரிந்தது. காந்தி 96 ரன்னில் வெளியேறினார். இதனால் குஜராத் 234 ரன்னில் ஆல்அவுட் ஆனது. உனத்கட் ஏழு விக்கெட் வீழ்த்த குஜராத்தை 92 ரன்கள் வித்தியாசத்தில் வீழ்த்தி சவுராஷ்டிரா இறுதி போட்டிக்கு முன்னேறியது.

Related Tags :

share

Most Popular

To Top
error: Alert: Content is protected !!